1Th 3 | MED | STEP | Ei kᵾn, enim uⱡ kit mbila, mana ping nimbun kel rondpᵾn, pilip mint mormin uⱡ ei, imp muⱡmin mel kapⱡa natilinga, numan ei mel pilip mint moⱡmina, mundmong ei, mi elinga, ya Atins kona ila muⱡᵾmbil etpᵾⱡ, tᵾl nga ᵾngᵾn Timoti, Got nga kongun endpa, Kraist nga ik puⱡ nimba ngumba etᵾm ei, enim kᵾn tᵾp mundᵾmbᵾⱡ. Kang wu ei ndi, enim tᵾpa rapundpa, enim nga mondpa pili orunga, etpa ronduⱡ mundᵾmba. I em ei kᵾn, enim uⱡ mbun mindil onum mbila ok, mana pi nᵾpeing. Enim pilik mormin ei, uⱡ mbun mindil iti mbᵾ, Got elim ndi, tᵾn wamp pora kandᵾp tᵾmin nimba pᵾtᵾm mel, tᵾtmᵾn.

1 Thessalonians 3

Timoti Tesalonaika Kona Ila Purum

1 Ei kᵾn, enim uⱡ kit mbila, mana ping nimbun kel rondpᵾn, pilip mint mormin uⱡ ei, imp muⱡmin mel kapⱡa natilinga, numan ei mel pilip mint moⱡmina, mundmong ei, mi elinga, ya Atins kona ila muⱡᵾmbil etpᵾⱡ, tᵾl nga ᵾngᵾn Timoti, Got nga kongun endpa, Kraist nga ik puⱡ nimba ngumba etᵾm ei, enim kᵾn tᵾp mundᵾmbᵾⱡ. Kang wu ei ndi, enim tᵾpa rapundpa, enim nga mondpa pili orunga, etpa ronduⱡ mundᵾmba. I em ei kᵾn, enim uⱡ mbun mindil onum mbila ok, mana pi nᵾpeing. Enim pilik mormin ei, uⱡ mbun mindil iti mbᵾ, Got elim ndi, tᵾn wamp pora kandᵾp tᵾmin nimba pᵾtᵾm mel, tᵾtmᵾn. 4 Tᵾn enim kᵾn, rᵾp ropᵾn murmᵾn ei kᵾn, tᵾn mondpa pili wamp mbᵾ pora, uⱡ mbun mindil iti mat, wote kandᵾp timin nitmin ni mel ku, akup uⱡ mbun mindil iti mbᵾ kandᵾp tᵾnmᵾn. 5 Ei nga pilip kᵾn, akup na ndi, Timoti tᵾp mundᵾr. Na enim nga mondpa pili orunga etᵾk mormin mel nant nda nᵾmp, Timoti tᵾp mundᵾr. Ei nambuⱡ emel, enim Seitan ndi, enim oⱡa tᵾpa, kandpa em ndam, tᵾn nga unt, enim kᵾn kongun etᵾp itmin uⱡ nimbᵾ, wei nᵾwᵾ itmᵾn mel pemba.

Timoti Nombuⱡa Rung Ik Kai Mat Mon Ropa Mepa Omba, Pol Nguⱡnga, Pol Numan Ngurum

6 Wote, akup Timoti, tᵾl kᵾn yant omba, Rᵾnang Ik Kai mat, enim nga mondpa pili orunga, wamp numan ngui uⱡ ei nga etmin ei mel, tᵾl kundpa nᵾm. Wote enim ndi, tᵾl kᵾn numan kai pendᵾk, aldpa kᵾnamin, ka nᵾk etᵾng mbᵾ mel, tᵾl enim kᵾn i ku nᵾmp pᵾtᵾmbᵾⱡ. 7 Ei angmᵾn, tᵾl nga mindil nui uⱡ mbᵾ tᵾtᵾmbᵾⱡ ei kᵾn, enim nga uⱡ kai etmin timan ei pilimbuⱡa, tᵾl ronduⱡ minal ngorum. Enim nga mondpa pili uⱡ ei ndi, tᵾl etpa ronduⱡ mundrum, ei mel, enim Nuim ei kᵾn ronduⱡ puk moⱡung ndam, tᵾl wamp kupa mel pep muⱡᵾmbil. 9 Akup tᵾn, Got nga kuimp keta ila, enim kᵾn numan mam ti elinga, Got kᵾn angge nᵾnmᵾn. 10 Rumbuldi rᵾnggilmᵾ mbila rᵾk rᵾk, Got kᵾn atinga ronduⱡ mondᵾp ropᵾn, tᵾn kopᵾt wak rangga, enim kᵾn ombun moⱡpᵾn, ik rungᵾndpᵾn enim nga mondpa pili ei, ronduⱡ pi napᵾm ndam, etᵾp ronduⱡ mundamin nᵾmp ninmin. 11 Tᵾn numan pᵾnmᵾn ei, Got Tipam elim kᵾn, Nuim Jisas kᵾn nombuⱡa mam ti, enim kᵾn uimin ei nga tᵾpa tiyangga! 12 Tᵾn nga wamp numan ngui uⱡ ei, enim kanmᵾn ei mel, enim nga orunga, Nuim ei ndi, i ku etangga! Wote, enim kᵾn tepa mba, wamp muⱡ kᵾmp kona mormin mbila, mba tepa kapⱡa etangga. 13 Uⱡ ei etᵾk itangina, Nuim ei ndi, enim nga mundmong orunga, etpa ronduⱡ mundangga, Nuim Jisas elim nga wamp wingti mbᵾ kᵾn, tᵾnggᵾt yant om ei kᵾn, enim Got Tipam ei nga kuimp keta ila wamp wingti raⱡᵾp muⱡmin.